政壇：貪曾赴壽宴鬼祟夾閃縮
本地印度裔望族夏利里拉家族掌門人夏利萊博士（Hari Harilela），前晚喺家族經營嘅尖沙咀金域假日酒店設宴賀九十大壽，唔少政商名流都送上祝福。夏利萊出名樂善好施，前幾日先豪捐五百萬元畀科大，原來佢仲好念舊，就算「貪曾」曾蔭權形象衰到貼地，做壽都請埋貪曾去飲，仲要有份坐主家席，等佢有餐食，但貪曾有冇做人情就唔知喇！
不過，貪曾夫婦始終難改出巡勞師動眾嘅惡習，當晚佢哋嘅座駕去到酒店時，唔止有幾名保鏢貼身開路，仲要酒店出動五、六名保安阻擋記者。到晚上十點幾離開時，冇風冇雨，但酒店保安就開晒四、五把遮，施展傘陣幫貪曾夫婦遮擋路人視線，極之鬼祟。人哋大壽高高興興，好心貪曾就大方啲向外界揮吓手啦，如果咁閃縮唔想畀人見到，就不如龜縮返屋企好過啦！
貪曾夫婦離開時，勞動保安人員組成傘陣幫佢遮醜。（劉志城攝）