政壇：棠哥「負傷」出山助解畫

立法會財務委員會尋日再次審議長津撥款，四十萬長者同社福界都聚焦呢件事，工聯會一舉一動更成焦點，佢哋阻撓撥款嘅立場已經引嚟唔少批評，無論係一直表現強硬嘅超級議員陳婉嫻，定係質疑政府要挾立法會嘅新丁麥美娟，都成為批評對象，內外不是人下，選舉後一直表現得信心滿滿嘅工聯會已經進退失據，尋日更要久未露面嘅工聯會榮譽會長鄭耀棠現身救火，坦承工聯會陷於夾縫中，巧合嘅係，佢尋日右手虎口位包住膠布，棠哥都損手，唔係畀嫻姐夾親呀？

澄清冇同泛民聯手

棠哥尋日出席公開活動後開腔回應長津一事，佢話工聯會堅持七十歲以上長者免資產申報領取長津嘅立場好清楚，不過呢個為長者謀更大福利嘅包裝，遠遠大唔過佢要澄清嘅事，就係嫻姐佢哋冇同泛民聯手做嘢。

工聯會反對政府撥款案，喺財委會上幾度同泛民政黨同一陣線，事件已經令建制中人不滿。更引起會內嘅反彈。棠哥尋日就疑似為工聯會處於目前困境定調，佢承認就長津資產申報，工聯會聽到外面有兩種意見，確實處於夾縫中間。

至於工聯會最終投票意向係點，棠哥話由幾位立法會議員自己討論同決定喎，棠哥呢招由議員自行「拆彈」，雖然夠晒尊重工聯會議員，但無助佢哋走出困境。到咗呢一刻，工聯會最後選擇跪低支持長津，或離場間接令長津撥款通過，都會成為輸家，且分分鐘要孭上搞到全港四十萬長者白白冇咗一個月津貼嘅鑊，更成為建制派嘅眼中釘，呢次真係玩政治玩出火。