強制驗窗被劏 宣傳不足靠害

揸槍打劫大家聽得多，驗窗打劫聽過未？唔係老作o架，有市民按照法例要求畀錢驗窗，點知居然被人撳住搶，同被人打劫無乜分別o架咋。

成件事係咁嘅，強制驗窗計劃今年六月三十日正式實施，有元朗區議員最近接連收到居民求助個案，唔係要求幫手驗窗，而係投訴懷疑被不良工程公司借機斂財！

投訴內容一式一樣，都係指有工程公司派傳單聲稱提供免費驗窗服務，然後借機提出高昂維修費用騙財，涉及金額由八千元至兩萬元不等。其中一名苦主係七旬婆婆，工程公司人員上門進行簡單檢查之後，話窗戶老化，唔符合屋宇署標準，然後未得同意之下就將其中一扇窗嘅膠條剪落嚟，聲稱攞去配對物料，維修費盛惠八千蚊。

嗱嗱嗱，係咪好過去搶呢？婆婆懷疑受騙，要求公司退回逾千元訂金，但得到嘅回覆係，訂金當中有三百蚊係向屋宇署繳交嘅申報費用，無得退回。更離譜嘅係，當日上門嘅工程人員懷疑係魚目混珠，並非當局指定嘅認可人士。

古仔講到呢度，大家有乜感覺呢？太一叮就好擔心嘞，咁搞法，強制驗窗計劃會唔會變成不良商人嘅謀財工具o架？對計劃一知半解嘅小業主會唔會被人當羊牯咁劏o架？嚟緊會唔會有更多市民蒙受損失o架？

所以話，一法立一弊生，強制驗窗計劃話就話為保障市民安全，點知結果適得其反。嗱，計劃實施咗幾個月，有幾多市民真正了解具體細節吖？強制驗窗程序係點吖？維修費幾多至合理吖？唔知係正常o架，因為政府關人個關，根本無做宣傳，叮！

你話屋宇署點做嘢o架？淨係強制要求市民驗窗，但又唔講解具體詳情，市民矇查查乜都唔知，唔被人呃就有鬼啦。立法會議員鬧得啱o架，屋宇署宣傳及推廣不足，不良商人先至可以乘虛而入，搞到市民受騙！

嗱，報紙專欄一片空白，俗稱開天窗，家陣屋宇署宣傳強制驗窗計劃甩甩漏漏，具體詳情一片空白，就係施政開天窗，等如鼓勵壞人入屋行劫，靠害市民，叮！

不過話時話吖，推行政策無心無肺，求求其其，早就成為港產官僚嘅獨特作風，都見怪不怪咯。呢，小巴超速同超載變成馬路炸彈，當局嘅打擊行動咪又係雷大雨小，搞到新界北嘅亡命小巴死灰復燃，十六座位嘅小巴坐咗二十人都有，問你服未。

一句講晒，強制驗窗漏洞多，港產官僚快快補鑊啦，叮！