政壇：搞搞政：蔡涯棉被錯笠行會高帽

新政府上場以來，官員、行會成員相繼出事，近排林奮強因為賣樓問題、甚至非法加佣賣樓風波而無限期休假，尋日有電台擺烏龍，邀請同樣熟悉房屋市場、任長遠房屋策略督導委員會成員嘅蔡涯棉出席節目，竟然喺新聞稿寫錯佢係行政會議成員，戴錯頂帽係小事，最怕引起外界以為行會要換人。

不過話說回來，蔡涯棉喺特首選舉時已係梁振英嘅忠實粉絲，多次為CY同新政府保駕護航，早前佢力主將啟德體育城用地改為興建公營房屋，更被外界認定係受命幫政府放風。日前立法會房屋事務委員會通過無約束力嘅動議，要求政府擱置容許白表申請人免補地價購買二手居屋嘅建議，CY急急澄清外，一直支持有關建議嘅房委會委員蔡涯棉都發表公開信，促請立法會三思。

態度咁勇，難怪被人以為佢升咗呢。不過，佢早排就啟德體育城嘅言論，搞到政府無喇喇遭外界批評，可見勇嘅後果可大可小。