政壇：嫻姐收聲長津通過有望

工聯會喺今屆立法會選舉一共贏得六個議席，「當年票后」陳婉嫻以老大姐姿態帶領新丁勇戰立法會個零月，不但冇揚聲威，反而喺長者生活津貼（長津）撥款一役上搞到兩面不是人，以建制派嘅身份同政府撐到行，搞到建制陣營同工會內部都反對聲眾，尋日佢哋同特首梁振英會面，事後嫻姐好似鵪鶉咁冇晒聲氣，由新丁麥美娟發言，老大姐似乎謝咗喎。

有人估計，嫻姐收聲主要為工聯會轉軚做緩衝，事關佢一出聲，大家實問佢對長津嘅投票立場，答咗反對又怕「講大咗」影響大局，更同四十萬長者過唔去，但答棄權又會被人話佢轉軚同跪低，所以都係少出聲為妙。另一種講法就係工聯會畀新丁熱吓身，你信邊樣吖？

今日財務委員會將審議長津撥款，據聞工聯會對投票已有兩手準備，如果民建聯全部乖乖坐定定，即係政府實夠票通過的話，咁工聯會六人就會全投反對票，但如建制派唔齊心，工聯會都要出招。