雙非產子似降溫 慎防春風吹又生

真定假o架？內地大肚婆湧港產子洪潮消退？雙非孕婦衝急症室亂象減少？對長期喺雙非陰霾下生活嘅香港人嚟講，呢個喜訊同聖經故事處女產子一樣咁疑幻疑真喎。

西諺有云，太好以致難以置信。雙非問題困擾港人咁多年，前朝政府手忙腳亂搞來搞去，結果都係藥石亂投，家陣突然話藥到病除，你信唔信吖？

咁啦，先為呢個雙非退潮喜象把把脈。業界係咁講嘅，本港明年起實施雙非零配額，加上龍年效應告退，私家醫院由於孕婦生產線大幅減產，已經紛紛轉型發展其他專科服務，私家診所亦紛紛關閉分店。唔使多講，隨住雙非絕迹，習慣月賺一百萬嘅「月球醫生」相信亦好景不常。

公營醫院又點呢？今年頭十個月到急症室衝閘產子嘅內地孕婦數目有九百四十人，比上年同期一千二百幾人大幅下降近兩成半，預約分娩嘅人數亦減少，公院產科嘅壓力可望紓緩咁話。

齋睇呢張雙非退潮超聲波圖像，情況幾好喎，本地大肚婆以後唔使腹大便便上街示威爭床位，急症室雙非孕婦衝閘亂象從此愈來愈少，一天光晒！唉，世界有咁美好，香港人就唔使一個二個患上生仔恐懼症啦，事實係呢個雙非熱潮減退現象可能只係虛火，隨時食詐胡，叮！

點解咁講？嗱，雙非零配額政策風頭火勢，內地又對境外超生加重罰則，係人都會暫時蟄伏避風頭啦，日後風聲一過，你估精甩辮嘅不法中介公司唔會靜極思動呀？你估熱衷衝閘行為嘅內地同胞唔會千方百計衝破防線呀？

更令人擔心嘅係，就算雙非退潮，如果單非湧港，香港產房一樣被淹沒。東方報業集團踢爆，中介公司早已變招應戰，教雙非孕婦先離婚再假結婚，化身單非孕婦攞正牌來港產子，只要支付二十六萬人民幣，即可提供辦證、交通、住宿等一條龍服務。簡單嚟講，即係雙非借單非投胎轉世，以另一副面目湧港產子。

特首梁振英話，房屋政策一車一車出台，單非孕婦遲啲可能真係一車一車湧港！你話嘞，雙非熱潮降溫係咪臨時表象吖？雙非亂象係咪隨時春風吹又生吖？

講到底，要根治雙非問題，最有效辦法就係唔再向雙非嬰孩發放三粒星香港身份證，釋法雖然產生陣痛，但長痛不如短痛，當局唔好再避嘞，叮！