SUN微博：網絡小說：不講英語的一天

「考生，你的口試題目是《不講英語的一天》，請準備好開始作答。」

「OK……吖……唔係，Sor，未準備好，等陣先……唔……好啦，我準備好喇！」

「考生，請開始。」

「咁呢，我係一個香港獨男，係正宗嘅『港獨』。咁今朝起身，擘大眼就即刻上網，喺you……優……優酷網度，睇我最鍾意嘅泡菜國女星啦。大家都知，gang……江……江南s……s……風格呢首歌紅遍全球，但係捧紅嘅其實唔係psy……psy……嘥氣跳核突舞嘅嗰條死肥仔，而係我女神－－泫雅！泫雅真係好叻o架，佢唱得跳得又睇得。咁我睇睇吓，情不自禁，隻手就不停咁向下摷，掏出咗一件長物，仲震吓震吓跳吓跳吓添！」

「原來，係我部新買嘅蘋果電腦流動電話五喺度響緊．有條友就用『甚麼的應用程式』傳送咗一則訊息畀我，講咗一大堆英文，我當堂就躁爆。其實，我哋作為炎黃子孫，好應該『逆翻牆』，爬番入去防火長城裏面，咁樣就可以免受夷狄入侵我中華禮法。放眼祖國，無論百度、人人網、酷狗，均毋須講任何蠻語。依家啲人，有《易經》起卦占卜唔學，偏要用洋人嘅『非死卜』，真係人心不古喇！」

「不過，由於世界是韓國人發明嘅，中國文化都唔例外，所以我鍾意女神都無違背作為一個中國人嘅原則。最後，我循例引用名人雋語作結。掌例暈己完講得啱，好哋哋做咩要講英文呀！」

「考生，考試時間已經結束。你現在可以離開。」

眾考官商議過後，給予此考生５**，理由如下：考生能力保不失，堅持不與英語為伍，其志可嘉；發言雖有沙石，亦頗能點題，予以５**級，盼繼續弘揚純種中文！