政壇：搞搞政：白鴿扮大佬黃碧雲捉蟲

前日沙田區議會鞍泰選區補選，結果由建仔嘅招文亮以四十五票之差險勝白鴿黨嘅游月華，但選舉餘波未了。事關盛傳會接任做白鴿黨主席嘅立法會議員黃碧雲，喺選舉結果公布後喺社交網站留言話：「唉！Donna（游月華）只欠四十五票，輸給民建聯。真要多謝一眾民建聯B隊。泛民散沙一盤，等多一百年香港都唔會有民主，就算有，都係建制派贏晒！……」留言好明顯係針對由民主派分裂出嚟嘅新民主同盟。

結果各路網民群起攻之，不斷諷刺白鴿黨自以為係民主正朔，其他民主派都係建制派，但又唔記得自己靜靜雞去西環就政制談判。新民主同盟立法會議員范國威亦發表聲明，話黃嘅言論缺乏從政者應有胸襟，大家不應對選舉制度失去信心，應該尊重選民選擇。

黃碧雲事後好快已經刪去呢段留言，但早就畀人複製咗，仲將幅圖不斷瘋傳，又用佢原文嘅格式，不斷二次創作，諷刺佢為「碧雲邪神」嘅網上專頁都應運而生。勢估唔到佢開第一槍，竟然反轟自己，搞到焦頭爛額。黃碧雲尋晚急忙道歉，話自己太過感情用事，願意收回啲言論喎。