政壇：曾智明就職台猛人到賀
由金利來太子爺Ricky曾智明做主席嘅港台青年交流促進會，上周六喺會展舉行理事會就職禮，順便慶祝十周年會慶。咁啱得咁蹺，佢翌日生日，近百位學生搞驚喜，趁散席時送上生日歌賀壽，查實壽星仔早前仲「升呢」做埋中總副會長，可謂三喜臨門。
Ricky就職，台灣政界猛人紛到賀，國民黨榮譽主席連戰長子連勝文、副主席蔣孝嚴姪兒蔣友松、榮譽主席吳伯雄公子吳志剛、台灣新北市議員陳明義等，紛紛由台灣飛到香港撐場。專程搭飛機嚟食飯。呢班政壇富二代平日絕少喺香港公開亮相，今次登場，場內女粉絲車輪轉爭住合照，搞到幾位名人「無啖好食」。
連勝文（中）、吳志剛（右）同陳明義（左）專程由台灣飛到香港恭賀一番。
曾智明（中）當港台青年交流促進會主席，黃英豪（左）同龍子明（右）齊支持。