政壇：CY高唱《讀書郎》籌300萬

建仔雖然幾年一次籌款，但一籌就籌到二千二百萬元。特首CY梁振英都畀面到場，佢上台只係唱咗半首《讀書郎》就籌咗三百萬，喺特首選舉輸畀佢嘅唐唐捐出一支法國波爾多名酒就籌得三十萬元，只係CY嘅十分一，差距認真懸殊。

尋晚係建仔二十周年籌款晚宴，目標係籌一千五百萬元，唔怪得主席譚耀宗開場就話「今晚擺明抽水」啦。捐贈之中，中聯辦副主任李剛捐出嘅○八年奧運火炬，最後由「玩具大王」蔡志明投得。節目仲有建仔創黨主席曾鈺成唱《紅棉》，太太跳舞，中聯辦副主任林武都有高歌。

但掀起成晚高潮嘅莫過於CY上台唱歌，佢唱嘅係家喻戶曉嘅童謠《讀書郎》，不過唱到一半就停咗。為咗唔好令善長仁翁失望，佢就動員到場嘅司局長上台幫拖。最後抽水大會喺肥媽領唱《友誼之光》下結束，大會一共籌得二千二百萬元，超出原本嘅目標。