政壇：立會FC齊腳保長勝

被稱為「長勝將軍」嘅立法會足球隊自○一年起未嘗敗績，至今保持十三場不敗紀錄。不過，足球隊以往大部分入球都係靠甲組外援球員射入，真正由議員射入嘅波可以話係少之又少。立法會依家招募新一屆足球隊隊員，有成十二個議員已表明會加入，當中大部分仲要係精力旺盛嘅後生仔。既然多咗咁多生力軍加入，希望各男議員下次可以入多兩球，唔使下下靠外援入波咁失威啦！

踢慣「前鋒」嘅人民力量陳偉業，「中場」嘅立會主席曾鈺成、醫學界梁家騮同社民連梁國雄都表明會留隊，謝偉俊話會繼續湊熱鬧玩埋一份。但昔日戰友黃毓民就話驚踢得耐冇晒氣，都係隔岸觀賽比較好。

新丁方面，建仔嘅陳克勤、何俊賢同陳恒鑌會組成「三劍俠」，全場最高嘅何俊賢就負責守龍，其他兩個分別踢前鋒、中場或後衞，三兄弟拍住上。

白鴿黨嘅單仲偕話向來雖然少踢波，但佢落場時通常會踢慣後衞，胡志偉就話自己比較長氣，可以負責嗰啲「人盯人」角色。工聯會郭偉強同新民主同盟范國威異口同聲咁話踢邊個位都冇所謂，同其他隊友「搓吓波」後先決定喎。

米飯班主未搵到

上屆領隊由身兼甲組球隊傑志會長「IT豪」譚偉豪坐鎮，而隊長就由做過班霸愉園同流浪班主林大輝兼任。按照足球隊不成文規矩，領隊每次踢完波後要科水請食飯，但隨住IT豪落選資訊科技界議席，今屆立法會足球隊邊個會咁抵得諗做領隊，同埋新球隊係龍定鳳，相信第一次落場後就會見真章。