賊的士滿宰而歸 旅遊業形象冚旗

「紅的」、「綠的」大家聽得多，「賊的」聽過未？唔知乜嘢係「賊的」？嗱，大家一聽全朵就知乜東東，就係賊的士。呢種騙財越貨嘅賊佬的士家陣愈來愈猖獗，街邊隨手一揚都隨時截到，好快就同「紅的」「綠的」一樣咁普遍嘞，叮！

形容賊的同紅的、綠的一樣咁多，呢種講法無錯係誇張啲，但係賊的士周街走的確係事實，而且遊客誤上賊車嘅案件與日俱增，唔到大家唔憂心o架。呢嗱嗱嗱，又有遊客中招嘞，幾猖獗呀！

一名馬來西亞籍女遊客喺尖沙咀狂掃廿幾萬名牌手袋同皮帶戰利品之後，獨自搭的士往中環蘭桂坊會合友人消遣，期間疑難掩興奮心情，途中一五一十洩露血拼戰績，結果招來劫禍。當的士駛到港鐵九龍站對開時，司機訛稱車輛故障，女遊客不虞有詐，落車打算轉搭另一部的士，點知未及走去車尾箱取回一包二包戰利品，賊的士即時踩油開車，絕塵而去。

賊的士真係劫開有條路，名店林立嘅西九龍區已經變成佢哋搜尋獵物嘅熱門犯案範圍，根據警方數字，半年來同類搶劫車尾箱行李嘅案件至少超過十單，今次涉案金額比較大咁解。

大家話嘞，遊客滿載而歸變賊的士滿宰而歸，呢種第三世界嘅常見罪案居然喺香港接連發生，係咪令人好憂心先？係咪令人好唔明先？香港假假哋都叫做國際都會同法治之區，賊的士一而再、再而三犯案，究竟係賊佬司機天性勤力吖，定係香港警察打擊不力呀？

咁講啦，警方真係要加加油嘞，無良司機由狂咪錶嘅掠財小技，紛紛轉食行劫掠貨嘅大茶飯，騙財越貨成為香港新興嘅街頭一景，明顯係有犯罪組織操控，罪案只會愈來愈多。再咁落去，莫講話旅遊業受打擊啦，香港嘅國際形象都隨時冚旗呀，叮！

賊的士唔止禁之不絕，反而愈來愈猖獗，明顯就係警方掃蕩不力。咁啦，如果警方真係坐視不理咯，咪由旅發局教遊客趨吉避禍囉，下一款遊客指南咁寫：「香港的士分四種，市區的士、新界的士、大嶼山的士及賊的士。前三種又稱『紅的』、『綠的』、『藍的』，賊的士則無色可認，遊客請自行執生。」叮！