政壇：政商定格：徐英偉DIY授子女國教
民政事務局局長政治助理Caspar徐英偉，最近忙緊幫細仔搵學校。佢細仔依家已經喺一間名牌幼兒園返緊學前遊戲班，如無意外可直升同校嘅幼稚園，但佢仍未心足，同時排緊隊申請入讀另一間名牌幼稚園。
Caspar話預嚟緊幾年嘅小學學位將會比幼稚園學位更搶手，依家開始諗定考邊間小學都差唔多。對於唔少家長都將有冇開辦德育及國民教育科，作為揀選學校嘅其中一項因素，本身係建仔黨員、根正苗紅嘅佢就話完全毋須考慮，因為無論學校有冇教同點教，佢都會DIY自行授課，教導好子女點樣做個有責任感嘅中國人。