政壇：林鄭婉拒紀念品撐環保
宣揚環保係特區政府其中一項重要任務，政務司司長林鄭月娥尋日為一年一度嘅明愛九龍區賣物會擔任主禮嘉賓時，堅拒接受紀念品，可能大會認為兩手空空唔多好，點都要安排一個小學生向佢獻花，但佢仍然婉拒，仲建議妹妹將紮花轉送畀媽媽。睇嚟佢係想帶頭做個好榜樣噃！
林鄭又話自己除係天主教徒、細個又喺天主教學校讀書外，之前做過社會福利署署長三年，所以一直同明愛有一段深厚感情。唔止林鄭對明愛有感情，現場市民對佢都好好感情，唔少市民見到佢即大叫「林太加油呀」、「我哋支持你」，好似變身小粉絲咁。
唔知係咪近排太掛住做嘢，林鄭消瘦唔少，佢一日跑幾場，黃昏出席另一活動時就叫大家唔使擔心，佢形容自己嘅健康係「從未如此咁Fit」，仲講笑話雖然年過四十，但一定有能力繼續貢獻社會喎。