政壇：教局兩任局長馬場碰頭
沙田馬場尋日舉行「保良盃」，養病中嘅教育局前局長孫明揚同現任局長吳克儉同場現身。新舊局長碰頭，冇傾「拆彈」心得，反而閒話家常，孫公話不在其位，當然靜心退休，佢早前去咗加國探舅仔一個月，返港後睇書充實自己，好學不倦。
保良局主席梁寶珠同千金林玉茵滿場飛招呼賓客。愛飲紅酒嘅副主席Eric鄭錦鐘，入馬場不忘帶私伙酒，拎出一支Vieux Chateau Certan 1999宴客，好友大讚酒味香醇，可惜佢全日小注怡情都係「食白果」。
吳局長亦入鄉隨俗，以幸運冧巴「2」、「9」落注買第一場，注碼三百蚊，估唔到亂篤冧巴都有三十五蚊意外收穫，認真Lucky。
孫明揚（右）同吳克儉（左）齊撐梁寶珠（中）場。