公器私用濫授勳 貪曾明益自己友

毛伯伯話齋，掃帚不到，灰塵照例不會自己跑掉。即係話，有灰塵就要掃，有垃圾就要清。呢，新政府首次啟動「搣柴」機制，褫奪三名因貪腐罪而被判入獄嘅政商人士勳銜，咪就係掃灰塵、清垃圾囉。此例一開，陸續有來，嗰啲牛鬼蛇神睇怕有得震冇得瞓咯！

今次被搣柴嘅權貴，包括會德豐及九倉前大班兼香港望族何東外孫洪承禧、華人廟宇委員會前委員胡詠紀、前自由黨成員兼前區議員蔣世昌，即日從特區授勳及嘉許名單中除名。話時話，三人其實都係煲呔曾任內被判入獄，但貪曾一直闊佬懶理，從來冇執行既定嘅褫奪勳銜機制，都唔知佢究竟有乜嘢企圖。

唔怪得有人話港產荷蘭水蓋愈來愈冇公信力喇，授勳淪為送禮，係又送，唔係又送，龍蛇混雜，睇見都眼冤喇。尤其喺煲呔曾任內，簡直公器私用，私相授受，將授勳制度變成政治酬庸工具，「曾朋友」幾乎人人有份。

呢，有「三點不露」之稱嘅前金融界立法會議員李國寶，攞咗個最高榮譽大紫荊勳章，連佢兩名兒子李民橋及李民斌都獲委任為太平紳士，問你服未。你可能會問，李國寶何德何能吖？佢究竟何德何能冇人知，但佢曾擔任煲呔曾競選辦公室主任就係人都知，淨係呢樣嘢都抵佢攞荷蘭水蓋嘞啩。仲有吖，嗰位日日鬧政府嘅所謂名嘴鄭經翰，淨係憑「煲呔針」呢個身份咋，就獲得金紫荊星章一枚，你唔恨得咁多嘅喇。

咁都仲未夠吖，煲呔曾任內「貪盡海陸空」，執包袱走人之前公布最後一份授勳名單，更加係盡地一煲，將荷蘭水蓋大派親朋戚友，佢一手提攜嘅前律政司司長黃仁龍獲大紫荊，同佢關係友好嘅地產商呂志和亦係大紫荊，前廉政專員湯顯明獲金紫荊，連前衞生署署長林秉恩都有一枚銀紫荊。奇就奇在廉署調查緊煲呔曾涉嫌貪腐嘅醜聞，佢喺咁嘅時候醒個荷蘭水蓋畀廉政專員，你話佢究竟有乜嘢目的吖。至於林秉恩咯喎，任內劣迹斑斑，醜聞不絕，究竟對香港有乜嘢貢獻呢？可能同佢執掌衞生署期間曾多次選擇性檢控東方報業集團有關啩。所以話，物以類聚，人以群分，真係冇講錯o架。

不過咁，出得嚟行，預咗要還。新政府撥亂反正，首次採取搣柴行動，有此先例，嗰啲牛鬼蛇神都唔保得幾耐嘅喇。嗱，咪畀太一叮講中吖，捲入官商勾結醜聞嘅前政務司司長許仕仁及煲呔曾呢對難兄難弟，可能都走唔甩，叮！