行行出狀元：生態講古佬「導」盡山水情

港人喜歡旅遊，香港地質公園躍升世界級，生態旅遊亦隨即升值，帶挈生態導賞員成為另一新興行業。吸引好動80後投身，走出辦公室，當上本港生態「講古佬」，說說岩石往事、動物秘聞，讓你發現，原來香港是這麼美！

「春天夏天睇珊瑚海豚，秋天冬天睇地質候鳥，香港四季都有嘢睇。沙士過後，多咗人去郊野玩，加上地質公園成立，生態旅遊興起，令唔少人對我哋呢行有興趣。」二十多歲的生態導賞員Crystal，「入行路」是在中學畢業後，由做導賞義工開始。

她現於一間生態旅行社當生態導賞員，為不同機構及客戶計劃路線及帶團，「同學校、培訓機構、環保團體合作，唔少公司、外國遊客都會包團，要求次次唔同，多數係一日團，當然都有一早計劃好嘅公眾團。」

籌備一個導賞團，需二至四星期準備，Crystal形容：「要決定集合休息地方、後備路線同定點導賞位置。每次帶團要預先走幾次，影低環境同紀錄出沒嘅生物，臨帶團再行多次，睇吓有無變化，仲會跟船家、當地村民打聲招呼。」

睇天做人 收入浮動

準備好就出發！乘玻璃艇探珊瑚家鄉，再回岸看螢火蟲笑臉。旅程按團友的喜好和能力編排，而每次會由一位導賞員同一位助理負責，團友人數比例最多是一比二十五。她帶團時更要法寶盡出，「隊旗、伸縮棒、對講機、放大片、葡萄糖、急救包，最常用就係大大張嘅圖鑑，方便用故事形式講解。因為導賞最重要可以引導你去欣賞嘛。」

導賞工作更肩負保育責任。○四年入行的Erik，現以自由身全職帶團及培訓導賞員。他認為：「生態導賞員要帶出可持續發展概念，欣賞海豚雀鳥，會保持距離，唔用擴音器。」

生態團可以上天下海，涵蓋知識層面廣泛，由植物昆蟲、文化歷史、地質濕地到海洋生態，Erik雖然精於地質，亦曾帶過浮潛生態團，當導賞員不可能天地通，卻要「一瓣精，瓣瓣掂」，因為團友不乏知識分子，隨時會「問到篤」。

此外又要捱得曬得，更要懂「執生」、留意團友身體情況，Erik說：「有時啲少年人與心儀對象同行，行到面青唇白都死頂，好易出事，要安排佢哋休息。講解深淺，都要睇團友接受程度，總之隨機應變。」

現時生態導賞員每團日薪由八百元至千五元不等，由於多數於星期六、日成團，又需看天氣因素，收入較浮動，行內人數過百，以兼職為主。而全職生態導賞員，多數於環保組織等機構服務，同時兼顧組織行政事務。

而本港未設導賞員發牌登記制度，機構招聘時多只參考導賞員過去經驗，以及有否修讀導賞或地球科學等相關課程。不過，行中打滾近十年，Erik對生態導賞員前景充滿信心﹕「香港蝴蝶、蜻蜓、候鳥品種繁多，仲有好多世界級地質景觀，香港其實好多嘢睇。」

晉升有「錢」途

職級 每團日薪

助理導賞員 $400 - $500

導賞員、境外導賞員 $800 - $1,000

導賞員導師 >$1,000