SUN微博：Sun畸事：影帝貪曾

好多好多年之後，一代貪官貪曾坐完N年監出番嚟，將佢嘅經歷拍成兩部電影，賣個滿堂紅，隨時影帝都有得佢做。兩部世紀大片牽起狂潮，以下就係兩位著名影評人就住兩套戲激辯嘅內容……

石奇：搣柴同盟真係世上最好嘅電影！

跣人：梗係唔係啦！計我話貪欲風雲先係不朽大作！

石奇：你睇真啲先啦！《搣》嘅選角卡士簡直係無人能敵！貪曾擔正不在話下，仲有覺得政治嘥時間，最後去咗拍戲嘅寶哥哥，同埋撈唔掂電台轉投影壇嘅大班針，真係唔講得笑！

跣人：咪傻啦！《貪》係跨港台製作，香江貪官同埋寶島之子兩個世紀大貪官同台演出，有今生無來世！

石奇：《搣》講嘅係一班貪慕虛榮嘅人為咗一兩個荷蘭水蓋去討好大貪官，最後被人搣番走晒，好有教育意義o架！

跣人：咁就唔係咁講啦，《貪》係講兩個貪官本身享盡榮華富貴不可一世，入獄之後日日血淚交織，好感動o架！

石奇：唉，其實我哋拗咩吖，貪曾做埋做埋咁多衰嘢，遲吓一定有報應。都唔知我哋仲可以睇佢演出睇幾耐！

跣人：咁又係吖，不如趁依家有得睇有得玩，睇盡佢玩盡佢好過嘞！