Sun奇古怪：Sun潮語「哂女」

自從新政府上場之後，位於添馬艦政府總部終日人頭湧湧。香港人為咗各式各樣嘅訴求，郁吓就去門常開嗰度示威集會，仲次次都係着黑衫，感覺就好似「晒馬」一樣。無他嘅，香港嘅政治制度一直都係發育不正常，係多數服從少數，同時所謂嘅代議士，跟本就不代表主流民意，佢哋只代表主子意思，咁作為無權無勢市民，要爭取自己嘅訴求就惟有親身踩上政府寫字樓門口「晒馬」，群情洶湧咁表達民意。

「晒馬」就即係將啲人馬晒出嚟。咁「晒女」又係咩呢？

「晒女」其實係網上流行嘅潮語，意思即係將自己同超索女友影嘅親蜜相，不停放上網，令其他男網友又羨又妒，係屬於「晒命」嘅一種。廣東話「晒」有炫耀嘅意思，所以將啲攬女相片放上自己fb或討論區，對啲足不出戶與女無緣嘅宅男嚟講，「晒女」絕對係一種討厭嘅行為。

如果淨係將自己同女友嘅甜蜜相放出嚟都仲情有可原，有啲人「晒女」係將自己同好多唔同女性嘅合照，晒命咁晒出嚟，仲要天天新款……Well……咁樣就有如國內富二代少女將大量銀紙鋪喺地下炫富一樣，令人咬牙切齒，恨得牙癢癢！有好多乞人憎分子，尤其係從事娛樂行業嗰班，「晒」親出嚟都係model級或明星級嘅漂亮女子，呢啲真係想即刻將佢unfriend……

自從有咗facebook之後，「晒女」行為有日益嚴重嘅趨勢。不過除咗「晒女」之外，好多人更鍾意响fb「晒命」，例如炫耀自己買咗啲咩名牌高跟鞋，又或者去咗高級餐廳食飯，又或者坐飛機去邊度遊埠等等……咁晒法……真係要小心「晒乾」！