政壇：搞搞政：鬍鬚曾捉蟲好開心

捉蟲喇！聽到呢句話，好多人第一反應估計唔會好，不過，財爺鬍鬚曾尋日出席個活動時，竟然捉蟲捉得好開心。政務司司長林鄭月娥前日先暗批上屆曾貪政府向全民派發六千元，認為呢個做法花耗公帑且幫唔到人，當時負責宣布派錢嘅鬍鬚曾尋日並冇回應林鄭嘅說話，只顧參觀攤位、見識香港原創嘅科技產品。

鬍鬚曾尋日出席「創新科技嘉年華二○一二」開幕禮，致詞時效法特首梁振英（CY）經常掛喺口邊加強「官產研學」之說，大講科技對香港產業發展嘅重要性，跟住唔夠一個鐘行咗近十個攤位，並對中大研發、狀似毛毛蟲嘅「爬衣服機械人」好有興趣，呢款蟲蟲有人體姿態傳感器，當你搖晃機械人時，佢可以好似寵物咁回應人，工作人員最初只係將條機械蟲放喺鬍鬚曾手臂，點知佢愈玩愈開心，更捉條機械蟲上胸口玩添。

早前推出樓市兩辣招後，本地樓市交易量即刻萎縮，地產建設商會放風向政府提折衷方案，大家本來想聽吓鬍鬚曾對呢件事有乜回應，但佢捉蟲之後就急急腳走咗。