政壇：中策組密密落區收風

特首梁振英（CY）將於明年一月發表任內首份施政報告，據講中央政策組已開始密密「收風」，中策組首席顧問邵善波同全職顧問王卓祺，更孖咇同地區人士會面，兩個人聽得多、講得少，雖然唔少議題都好地區性，但孖咇顧問就一樣咁重視，令人不期然聯想CY唔通對地區政策有新諗頭？

消息話，邵、王兩人之所以咁緊張，全因為CY想喺下年一月嘅施政報告，向市民交代上述關乎民生同日常生活嘅改革，有份出席諮詢會面嘅中西區區議員陳財喜話，當日會面一個半鐘，席間一眾區議員主要表達咗希望政府將來規劃地區發展時，可以多啲諮詢區議會。仲話依家民政事務專員權力唔夠，其他部門亦唔會聽專員支笛，好多問題好似亂泊單車、電訊商易拉架阻街問題等，都因為現行政策僵化，遲遲都解決唔到。亦有區議員建議政府下放權力予區議會處理食環及街道清潔等工作。無論點都好，CY改善地方行政制度嘅決心，連地區人士都睇得到。