政壇：廠商會青委《江南Style》賀壽
韓星PSY一首《江南Style》火速熱爆全球，香港廠商聯合會一眾青委前晚喺十五周年生日派對，大家都嚟玩一次青委Style。四十幾位青委花個幾月練舞綵排，拍咗輯《廠商會青委Style》，喺晚宴首播，平日官仔骨骨嘅廠商會會長施榮懷更除低領呔，同前會長黃友嘉及副會長吳永嘉即場跳番轉騎馬舞，high爆全場。
青委主席顏明潤搞搞新意思促成拍呢段片賀壽，副主席劉子芸為此狂煲網上片段鑽研舞步，拍心口教青委拆解舞步，近四十個青委包括副主席顏明秀、黃浩鈞、羅程剛、前主席蔡志婷等齊齊跟住學，大家一跳上癮，結果段片一播，場內即刻尖叫連場，一眾商會高層大叫Encore，仲提議將片放上YouTube。
好玩得嘅會長施榮懷（箭嘴示）被一眾青委捉上台大跳《江南Style》。