政壇：黃錦星網戰搶民意

新政府登場已過百日，新丁局長同部門嘅磨合亦進入穩定期，環境局尋日宣布新猷，局長黃錦星會喺局內嘅網頁開設網誌，定期同市民溝通吓。黃錦星呢一着並非新招，財爺鬍鬚曾甚至再早啲都有問責局長用過，但透過網絡戰既能開闢陣地及時回應外間對環保問題嘅火熱話題，又可以增加自己嘅曝光率同知名度，雖然舊瓶新酒，但能搶佔民意就係好酒，由此可見黃錦星似乎已經窺探到為官之道嘅竅門了。

環境局齊腳推政策

環境局嘅工作範疇雖然談不上敏感，卻同市民嘅生活環境、生活習慣密切相關，而環保更係錢同成本嘅代名詞，如環境局只依循舊有嘅公共諮詢同政策解釋方法，恐怕只會重蹈之前窘局嘅覆轍。

依家環境局副局長、政治助理已齊腳，黃錦星亦開始佢哋嘅文宣及溝通攻勢，佢尋日首篇網誌就大講生態旅遊，話正與環保團體及相關組織探討開展「育養海岸」項目，倡導官民合作，保育海岸。

近期大埔龍尾建造人工泳灘一事又起爭議，黃錦星話，港府收到環保團體要求當局喺兩個月內根據環評條例，覆檢龍尾人工泳灘計劃在選址，以及對水質、生態平衡影響嘅信件，政府唔同部門正歸納資料盡快回應，佢強調，港府內部未有共識且需要審視更多資料去決定。

不過，守護龍尾大聯盟今午就會喺政府總部草地發動守護龍尾集會，預計有五千至一萬人參與。另外，據知環團研究擬先由保育人士何來以個人身份入稟司法覆核，力阻當局興建龍尾海灘，點都好，黃錦星好可能成為喺政府廣場抗議嘅團體高喊口號同個名嘅又一位局長。