維港水質大倒退 環保不容再衰頹

弊傢伙，維港水質大倒退！

第二年復辦嘅維港渡海泳剛剛結束，當局口口聲聲話維港水質大有改善。言猶在耳，環保署發表二○一一年香港海水水質報告，自爆全港各區水質達標率大幅倒退，尤以維港水質跌幅最勁。維港貴為香港象徵，水質竟然愈搞愈衰，咁你話係咪羞家先？係咪弊傢伙先？

嗱，報告指出，香港各區海水水質嘅達標率，由一○年嘅百分之八十降至一一年嘅百分之七十五。維港水質達標率更由百分之七十七降至百分之五十，幾乎打回二○○二年原形。環保署解釋，去年八月天氣異常酷熱，令海水嘅無機氮水平增加，加上吐露港污水經明渠排到維港，先至搞到維港水質變差喎。

咁就奇怪啦，港府多年來投放大量公帑搞淨化海港計劃，明明話維港水質大有好轉，所以去年准許復辦渡海泳，乜原來呃鬼食豆腐o架？唔怪得賽後有健兒投訴，話游水時驚見抹碗布同蕉皮，上岸時仲畀蠔殼割傷，真係醜死鬼咯！

其實一早已有環保團體指出，維港水質大腸桿菌含量嚴重超標，只不過港府當作耳邊風，搞到維港水質差到嚇死人，維港變臭港，咁嘅情況下仲要搞渡海泳，你話係咪害人吖。環保署話喎，二○一四年淨化海港計劃第二期甲工程完成後，排入維港嘅污染物可望大大降低，到時水質應該見得人o架喇。

講係咁講啫，弊就弊在其他海域嘅水質亦唔見得人呢。好似吐露港同赤門咁吖，水中嘅溶解氧不達標；后海灣仲得人驚，竟然係全港水質最差嘅海域；而觀塘避風塘沉積物總金屬含量更係全港最高。港府只知頭痛醫頭，腳痛醫腳，改善水質唔止一事無成，仲退回十年前水平，簡直豈有此理！

唉，講開又講，維港變臭港真係一啲都唔出奇。大家都知啦，港府過去不嬲唔重視環保，喺一班庸官眼中，維港最大用途唔係填海就係排污，前朝特首貪曾被封為「氣候逃犯」，真係實至名歸o架。家陣改朝換代，梁振英政府聲稱大力發展環保，咁就唔好等啦，快快搞番掂維港水質，唔容許環保工作繼續衰頹落去o架！

一句到尾，保護維港，港府有責。如果一個城市只知發展經濟，肆意破壞天然資源，咁嘅發展模式係冇前途嘅。唔該港府醒醒定定，盡快改善海港水質，好好愛惜大自然，還大家一個美麗香港，叮！