SUN世代：童年已開始做衫

童話故事中的魔法師，揮揮神仙棒，就可以事事自行辦妥，自己甚麼都不用做。不過，Janko這位魔法少女，童年至今，由洗衫煮飯到開業選舖，事事親力親為，一雙巧手就成為她的神仙棒。

「四、五歲已經做家務，餵豬、執柴、煮飯，咩都會做。嗰時個煮食爐好高，我唔夠高，就預備晒啲材料，叫阿哥嚟煮。」Janko憶說，小時候在海南島生活，由媽媽支撐整個家庭，每天出外勤勞工作，故兩兄妹都十分懂性。

因生活清貧，一年才添一次新衣，Janko童年的玩具亦只有一個洋娃娃，但她卻自行為洋娃娃年年改變形象，增添新鮮感。「我有親戚做布廠，會畀啲布碎我，我就會幫公仔做衫，仲會幫佢年年剪吓頭髮。佢原本好長頭髮，但每年剪啲啲，到我移民嚟香港讀小六嗰時，個公仔啲頭髮就好短囉!」沒有豐盛的物質生活，亦可自得其樂，也許，魔法就是這樣練成。