政壇：政商定格：滙豐邀中學生學做CEO
CEO唔易做，滙豐香港區總裁馮婉眉（Anita）最近多咗五個學徒，原來有五位學生跟住佢學做CEO，呢班學生來頭都唔細，五人分別係來自聖保羅男女中學及沙田學院，透過由滙豐主辦嘅「滙豐少年財務策劃師大賽」及贊助嘅「JA學生營商體驗計劃」得獎，先可以做到Anita嘅「影子CEO」。
「影子CEO」為一連兩日「滙豐體驗計劃」中嘅一項活動，除咗可以跟住Anita做嘢，體驗高層嘅實際工作之外，五位學生仲去咗唔同部門參觀，包括零售銀行及財富管理業務。第二日就去埋滙豐將軍澳資訊科技數據中心添。有同學仔話，過程中最大嘅得着係有機會跟滙豐管理層、部門主管交流，聽吓佢哋嘅經驗，對未來嘅人生和事業發展都有好大幫助喎。
馮婉眉要教五個影子CEO做總裁之道。（資料圖片）