政壇：政商定格：下月大婚啟剛笑住食早餐
快將迎娶「跳水公主」郭晶晶嘅霍英東家族長孫霍啟剛呢排好忙，醫肚最緊要快，上周五佢就喺上環信德中心歎麥記平民早餐。啟剛呢日着住直紋白恤衫襯黑色西裝，臉上掛着招牌陽光笑容，佢望上去瘦咗好多，成個臉形尖晒。
我哋問佢係咪因為準備結婚而減肥？佢笑住答話唔係，為咗健康就真，但近期準備婚禮的確好忙。咁婚禮搞成點？佢笑笑口賣關子，唔肯講多句。據知啟剛將於下月八日，喺沙宣道霍家大宅舉行婚禮註冊儀式，由梁愛詩擔任婚姻監禮人。忙婚禮之外，佢呢輪仲頻密出入南沙，籌備喺當地建設一座霍英東紀念館。啟剛話為咗令紀念館嘅內涵更豐富，佢訪問咗好多爺爺嘅老朋友，聽聽埋埋好多阿爺鮮為人知嘅事迹，深受感動，仲因此而增進對爺爺嘅了解添！
霍啟剛歎平民早餐，絲毫唔見富家子弟嘅架子。