政壇：搞搞政：林鄭忙極照撐保育

新政府上任三個月以來，政務司司長林鄭月娥幾乎隔日就現身，忙到甩轆，早前瑪利諾修院學校（小學部）新成立嘅保育中心開幕，林鄭都有到場支持，呢一行既撐為母校籌款嘅媽打李麗娟，又撐保育活動，林鄭仲真情剖白話，好難忘做發展局局長嘅日子，咪以為佢咁講係對身在高位有乜感慨，佢只係好鍾意保育工作啫。

呢日嘅活動除咗請得林鄭外，瑪利諾嘅一眾前高官校友都紛紛撐場，校監余黎青萍亦有出席，連貿易發展局主席蘇澤光都曾經喺呢度讀過兩年書。

已被列為古蹟嘅九龍塘「瑪利諾」，懷舊歷史多籮籮，蘇澤光就讀咗兩年，然後轉去做「喇沙仔」。媽打更係瑪利諾嘅「大姐大」，由幼稚園到中學，留下十四年青葱歲月，仲經常考第一名。

名人舊生仲有廖創興新抱廖湯慧靄及理文造紙主席李運強千金李文慧，三人聯同一眾舊生及家長，合力為保育中心籌得逾一百萬元。