政壇：馬時亨賣樓勁賺半億

本港樓價屢創新高，前商務及經濟發展局局長馬時亨（肥亨）最近都成功出售住咗十六年嘅港島中半山澄碧閣單位，據傳肥亨夫婦將旗下公司名義持有嘅澄碧閣二樓單位，以董事轉名方式轉讓畀上市公司莊士集團高層，以接近九千萬元成交，同佢喺九六年以三千二百八十萬元購入價計算，勁賺五千多萬元。

呢宗買賣據講係「神」嘅安排。話說肥亨喺數月前一個飯局上巧遇莊士集團主席莊紹綏，席間莊談及有興趣買番個澄碧閣嘅單位，肥亨問有冇興趣佢嗰間，事後睇樓半個鐘就成交。據講肥亨早就想賣樓，但太太王培琪反對地產經紀帶外人出出入入先拖到依家，而十月初交易後，肥亨連錢都收埋。

肥亨大女嫁咗人，佢兩夫婦同細女住三千幾呎確係太大。我哋問番肥亨呢單賣樓消息，佢只係話莊士集團係上市公司，所以佢唔方便透露咁多交易詳情，但強調現階段仍然住喺澄碧閣。至於肥亨將旗下公司轉名售予莊士集團後，據聞公司新增咗該集團嘅董事總經理高上智、執行董事莊家彬及莊家蕙。家彬同家蕙都係莊紹綏嘅仔女。