政壇：何君堯新界起義

新界村屋僭建已成新政府另一個炸彈，雖然當局已經將申報制度嘅限期延長到十二月底，但村民嘅態度未見軟化，出身法律界嘅屯門鄉事委員會主席何君堯唔單止呼籲村民抵制申報，更加係「爭取新界村屋僭建合法化工作關注組」嘅發言人，下個月十一號，據講佢又會搞個新界人大遊行，抗議政府強硬執法。呢種激烈抗爭梗係贏得唔少掌聲，更有原居民形容佢係「新界洪秀全」，不過，呢個起義嘅比喻對象最終失敗收場喎，改呢個外號嘅村民知唔知o架？

有新界鄉紳爆料，話何君堯會搞大遊行，仲呼籲大家當日下晝三點鐘喺元朗賽馬會廣場集合，遊行嘅主旨係，村民用盡方法同政府傾，但特區政府係都要拆僭建、盡毀原居民家園，所以佢哋要上街抗爭。報料人仲話，到時何君堯會行頭帶隊，示威者亦都會高舉代表港英時代嘅旗幟添。

佢仲解釋抬出港英時代嘅旗幟，係因為佢哋要抗議現政府不如港英時代嘅政府咁尊重新界人，竟然搵佢哋開刀，搞到原居民權益變得面目全非。我哋打過電話畀何君堯問吓係咪真有其事，佢聲稱自己當時開緊會，但至截稿前都仲未有回覆。

未必獲新界王支持

何君堯力撐新界村屋僭建，好似變咗鄉村英雄咁，仲有人話佢今日嘅行動可以媲美當年對抗滿清政府管治嘅太平天國領袖洪秀全喎。

不過，何君堯同新界王劉皇發嘅關係麻麻，彼此更做過屯門鄉選嘅對手，呢次由何發起嘅行動會唔會得到鄉事派其他勢力撐呢？我哋真係要拭目以待。