龜速化驗問題麵 靠害市民官犯賤

特首梁振英提倡「香港速度」，啱o架，效率好緊要，否則以一個快字做賣點嘅即食麵就唔會成為二十世紀最偉大發明，更加唔會成為香港無飯家庭嘅必備佳餚。

嗱，既然效率咁緊要，為食品安全把關嘅政府部門就更加唔可以慢條斯理嘞。你知啦，禍從口入好大鑊，重則攞命，輕則損害健康，把關官僚稍為反應遲鈍，都分分鐘害到市民雞毛鴨血。點知好衰唔衰，食環署就係一個遲遲鈍鈍、慢手慢腳嘅散漫部門，真係畀佢吹到啤一聲，叮！

食環署點遲鈍法呢？韓國農心食品被驗出六款即食麵含有致癌物「苯並芘」，其中五款證實在港有售。本來呢，有食品懷疑出問題，最安全嘅做法就係落架回收囉。好似韓國同台灣咁，第一時間停售相關即食麵，乾手淨腳，搞掂，食碗麵。嗱嗱嗱，內地同日本稍慢半步，但日前亦已經急急頒下回收令。反觀香港慢條斯理，唔嗲唔吊，莫講話無採取任何預防措施，甚至連化驗結果都未有，你話死唔死吖！

食環署署長梁卓文解畫話喎，相關即食麵產自不同地方，批次亦唔同，未有科學同事實根據之前，唔會強制銷售商回收貨品。

叮佢個鎯鎯，官老爺咁重視科學同事實根據，化驗工作就唔好慢過龜爬啦。大吉利是講句，萬一啲麵真係有問題，等到你哋滋油淡定完成化驗，都唔知幾多市民受害咯！

市民健康最緊要，如果當局擔心下令回收有損商家利益，咪要求貨品暫時落架停售囉，直至證明食得放心先至賣畀市民。港式官僚效率再慢，斷估化驗結果唔使等到出年重陽拜山至出籠啩？

衞生官僚餐餐都係咁，明知食品安全已經拉響警鐘，硬係懶懶閒閒，闊佬懶理，民急官唔急。三聚氰胺毒奶係咁，蘇丹紅禽蛋係咁，哮喘藥豬肉係咁，孔雀石綠淡水魚係咁，次次把關漫不經心，愛理不理，到驗出真係漏招嘞，就氣急敗壞出來宣布壞消息，蚊瞓啦。

梁卓文哥哥，閣下部門咁樣嘅辦事作風，絕對唔配叫「香港速度」，叫「香梗速度」就差唔多，實死火o架。不怕一萬，就怕萬一，如果市民有乜冬瓜豆腐，呢個責任你哋孭唔孭得起呀？

龜速化驗問題麵，靠害市民官犯賤，前朝周一嶽就係人辦，「每周一鑊」嘅污名令佢千夫所指。新政府求變上場，唔該港府官僚快快洗心革面，等市民放心食麵，叮！