政壇：政商定格：陳秉強住家飯賀雙幣雙股
港交所千辛萬苦催谷下，終於有第一隻「雙幣雙股」出世，身為港交所人民幣產品專責小組主管嘅陳秉強應該可以鬆一口氣！事關佢「老闆」、港交所行政總裁李小加好緊張有冇企業發行人仔股票，差不多好似係佢個baby咁着緊，依家人仔股票終於順利出台，對各方總算有所交代！咁佢對陳秉強會唔會有乜獎勵呢？
陳秉強好低調咁話李小加輕輕拍咗吓佢嘅膊頭，叫佢要再努力！雖然李小加只係輕輕一拍，但喺職場多年嘅人都知，獲老闆鼓勵，無疑係肯定員工嘅表現。
人仔股票成功出世，咁佢有乜慶祝呀？佢話唔會咁容易沾沾自喜，但都會同老婆食飯慶祝。咁喺邊度食呀？點知佢反高潮，話返屋企食！
陳秉強獲李小加鼓勵。