政壇：政商定格：CY住禮賓府宜放置火爐

特首CY梁振英當選後一直住番喺山頂貝璐道裕熙園大宅，等待禮賓府裝修完畢後先入伙。等咗近四個月，CY兩夫婦尋日終於名正言順入主禮賓府，但根據政府新聞處公布嘅資料顯示，原來禮賓府嘅定期維修及翻新工程仲未完成，預計今年十二月先可以全部搞掂。其實我哋之前都講過，禮賓府發現有多處嚴重漏水，落大雨時更要搵大桶接水，情況都幾嚴重。

咁CY揀尋日搬入禮賓府，究竟係咪好日子呢？堪輿學家蘇民峰話尋日日子同CY生肖冇相沖，建議最好換埋大門，因此舉等同重新入伙，可以改善地運。蘇師傅贈多兩句，建議CY可以考慮喺禮賓府中間放置火爐，事關中銀大廈外形就好似把劍咁，火爐可以「煉劍」，咁樣可以聚氣喎。

第一手消息請下載on.cc東方互動iPhone/iPad/Android/Windows Phone Apps

禮賓府裝修執漏工程尚未完成，但梁振英夫婦尋日已正式遷入。