政壇：清華蒙民偉音樂廳揭幕

雖然「電器大王」信興集團創辦人蒙民偉已逝世兩年，但佢對母校北京清華大學嘅貢獻一直延續落去。蒙太王蓓芬上周六喺清華「蒙民偉音樂廳」舉辦紀念音樂會，正式為音樂廳揭幕，唔少蒙叔生前好友都赴京出席。蒙叔愛女Perlie蒙珮兒當日即場以鋼琴彈奏爸爸生前最愛聽嘅《一九零五奏鳴曲》，當大會播放蒙叔生前嘅片段時，蒙太更感觸落淚。

紀念音樂會陣容鼎盛，請來樂壇知名嘅年輕小提琴家黃蒙拉同鋼琴家宋思衡獻藝，仲有名指揮家張藝擔任音樂總監嘅中央芭蕾舞團交響樂團傾力演出。蒙太話丈夫生前捐建呢座音樂廳，好遺憾佢未等到完工已仙遊，依家邀請到出色嘅音樂家喺音樂廳內獻技，希望佢在天上能夠睇到，圓佢心願。Perlie就話到呢一刻都感覺爸爸好似冇離開過咁，每當佢掛住爸爸嘅時候就會寄情於音符，將父女親情永存心中。

清華大學校長陳吉寧就大爆早年蒙民偉每次到「蒙民偉樓」視察，都要參觀埋個廁所，確保乾淨清潔至安心，事關佢覺得衞生對學生嘅健康好重要。