政壇：貪曾神秘飯局夜會發叔

「貪曾」曾蔭權卸任特首後，避走外國消失一排，但佢喺九月立會選舉後又再度現身香港，而且動作多多，不過行徑極度鬼祟。繼早前一味靠黐，跟班富豪去內地浙江遊埠後，上周三朝早去完拜山，夜晚又被發現約會一班「曾朋友」去中環香港會所食飯。點知尋晚我哋又發現貪曾神神秘秘，疑似同新界鄉議局主席劉皇發飯局，同時出現嘅仲有行政會議成員查史美倫夫婦。

貪曾夫婦尋晚約七點鐘，坐住架政府專車去到灣仔會展嘅皇朝會食飯，同場仲有一名保護要人組警員陪同，真係浪費公帑。直到夜晚九點半鐘左右，貪曾兩夫婦大搖大擺咁離開，睇真啲，跟住行出嚟嘅竟然有發叔同查史美倫夫婦。發叔身穿西裝，加埋條紅色呔，一眼就畀我哋認出，見佢手上仲挽住袋嘢添。我哋嘗試打畀發叔求證，但響咗好耐都冇人聽，究竟係因為太夜，定係發叔驚被人問起同貪曾食飯一事，咁就只有當事人先至知喇。