政壇：錢果豐冧莊掌港鐵

港鐵可加可減機制搞到天怒人怨，身為港鐵主席嘅錢果豐成為眾矢之的，不時被關注民生嘅政黨話佢獅子開大口。不過你有你鬧，錢果豐地位穩如泰山。

政府尋日公布，根據香港鐵路有限公司組織章程，以及作為大多數股份持有人嘅財政司司長法團再次委任錢果豐為港鐵董事局主席，任期由明年一月一日起生效，至一五年底完結。佢由○三年七月首次獲委為地鐵主席，兩鐵合併後就亦一直出任主席至今超過九年，完成新任期就會做足超過十二年。

非執董鬧人才荒

港鐵近年最受人質疑嘅，肯定係兩鐵合併後設立嘅「票價可加可減機制」，皆因近年永遠有加冇減，即使年年賺大錢，港鐵仍堅決加價。喺龐大民意壓力下，政府早前開始就呢個機制諮詢公眾，並將於下月中結束。

有政界中人估計，錢果豐再度獲委任，除因本身係上市公司嘅港鐵喺佢領導下不斷賺錢外，港鐵要繼續依賴佢同各界周旋，力保可加可減機制先係佢可以繼續留任嘅主因。無他嘅，錢果豐政商界人脈廣，都不知有幾多公司想搵佢入董事局，有佢坐鎮，辦事自然事半功倍。講開又講，其實商界早就流傳，市場上極之缺乏擔任董事局非執行董事嘅人才，搞到唔少人要一人做多間公司非執董，唔通作為港鐵大股東嘅政府都有呢個人才荒現象，所以一定要錢果豐繼續「冧莊」？

工聯會立法會議員鄧家彪就質疑，政府委任多位社會上知名人士入董事局，但佢哋就好似冇從小市民的利益出發。錢果豐連任已成定局，到底佢會唔會改為從小市民角度出發？大家真係要放長雙眼睇到實喇！