招數密密出 樓價急急升

炒風熾熱，樓市失控，政府終於再度出招。呢次究竟係第幾次出招，睇怕已經冇人數得清，大家只知道，根據過往經驗，政府出招一次，樓市就升一輪，招數愈多，升得愈急，歷史會唔會重演，仲要拭目以待，但估計都未可樂觀嘅喇。

呢次主要有兩招，第一招，向境外人士及公司買家徵收百分之十五印花稅，第二招，提高額外印花稅率及將適用期由兩年延長至三年。財政司司長曾俊華係咁講嘅，最近一兩年樓宇短炒活動有增加趨勢，加上超低利率將維持至二○一五年，提高及延長印花稅措施係針對相關問題喎。

講就係咁講喇，但止唔止到咳，睇怕連財爺都唔敢擔保。嗱，曾俊華自己都承認冇一粒「子彈」可以解決所有問題，現時最大難題係供應不足。冇錯嘞，雖然話遲到好過冇到，有招好過冇招，政府肯正視問題，諗辦法為樓市降溫，總好過翹埋雙手乜都唔做，但歸根究柢，如果當局冇辦法喺短期內明顯增加土地及房屋供應，講乜都係假。

點樣先至可以增加供應？填海被指破壞環保，發展新界東北又被指「割地賣港」，無計可施之下，有人居然打啟德體育城主意，建議將塊地改為興建公屋及居屋喎。點知建議一出，即刻引起體育界人士強烈反彈，搞到滿城風雨，幾乎要上街抗議咁滯。鑑於勢色唔對，政務司司長林鄭月娥尋日被迫出嚟解畫，承認相關部門確實曾做過初步研究，希望地盡其用，但鑑於啟德體育用地已列入分區計劃大綱，唔可以隨便更改，所以決定按原計劃推進體育城項目。

咁就啱嘞，體育城計劃已經醞釀咗十幾年，體育界人士等到頭髮都白，依家一聲推倒重來，唔知仲要等到幾時至有體育城，唔反對至奇喇。再講，香港社會愈來愈政治化，乜嘢都拗餐飽，連被視為惠民措施嘅長者生活津貼都受到立法會議員阻撓，依家建議擱置體育城改建公屋，盞添煩添亂嘅啫，根本不切實際。

查實，香港已開發面積僅佔總面積兩成幾，唔係冇地方可以發展，而係政府弱勢，動輒得咎，有地都用唔到。講到底，泛政治化嘅問題唔解決，政府冇辦法強政勵治，就算將成個啟德甚至連新政府總部都用來起公屋，或者推出再多穩定樓市措施，都係嘥氣嘅咋，叮！