SUN奇古怪：Sun潮語：【癡蝦殼】

有些潮語如果照字面解，係會完全唔知點解。例如「癡蝦殼」就係一個例子。最近翻看一齣港產片《飛砂風中轉》，片中飾演鄭伊健阿媽嘅黑幫母親余安安，响幫會會議上，鏗鏘有力地以一句「癡蝦殼」，大鬧其中一位由方中信飾演嘅江湖大佬。但到底鬧人「癡蝦殼」又係點解呢？

鬧人「癡蝦殼」，其實係無具體意思同解釋，即係你get到咩就係咩。係咪好神奇呢？最神奇係，被鬧嗰位通常都get到個意思。「癡蝦殼」大概嘅意思，其實有等同係鬧人癡線或癡x線。「癡蝦殼」有些少粗口感覺，但三個字中竟無一個字係粗口！所以響電影裏面，余安安可以大大聲爆出嚟，而套戲又唔使評為三級，甚至比鬧人X街更為文雅。

據觀察，好多女仔都鍾意用「癡蝦殼」呢句潮語嚟發洩情緒，甚至一個本身唔係成日講粗口嘅人，躁底起上嚟都會爆番一句「癡蝦殼」嚟發洩吓。記得以前有個女同事，開夜開到凌晨四點，個客都仲不斷要求改嘢，搞到平時原本係斯斯文文客戶經理嘅佢，同客戶收線之後都不禁吆喝一聲「癡蝦殼」嘅仲改改改……唔使瞓咩？」今時今日，甚至有人將「癡蝦殼」簡化為「癡殼」，連蝦都慳番。

點解「蝦殼」會癡呢？真係不得而知，「癡蝦殼」又係幾時潮起上嚟呢？都無從考究。曾經懷疑過「癡蝦殼」係咪同烹飪有關，「癡」其實唔係癡線個癡，而係咪應該係黐住個「黐」？因為有時煮蝦仁嘅時候，係要剝咗蝦殼出嚟，逐隻逐隻搣蝦殼呢個工序，有時確係幾煩，會唔會係咁師奶搣蝦殼搣到發脾四大嗌，從而創出「癡蝦殼」呢三個字呢？唔好話，都真係有咁嘅可能！