政壇：政商定格：整Cake靚女行善講創意
今時今日，籌款都要講創意，香港愛滋病基金今年搵咗整Cake靚女黃彥婷（Sharon）舉辦「Love Cake慈善行動」，以義賣Cup Cake及工作坊形式為基金籌款。基金會副主席趙曾學韞都加入，親手試吓做餅嘅滋味，唔好以為趙太遠離廚房，佢嘅手勢都唔錯，話咁快整咗件靚靚Cup Cake，連基金會主席梁智鴻都話正。
Sharon兩年前創辦Let Them Eat Cake，佢原本喺英國做室內設計師，返港之後卻變咗整cake達人，今次佢就同義工們通力合作炮製幾個大型展品，包括由五百個蛋糕仔砌成嘅巨型紅絲帶畫作，仲有一個名為《希望滿載》嘅作品。
掀起Cup Cake熱潮嘅靚女Sharon，以《希望滿載》為病友帶來希望。