政壇:搞搞政:劉夢熊寄語CY硬淨施政
新政府上場之後,新界東北發展計劃同德育及國民教育科都搞出軒然大波,社會上支持同反對嘅立場好對立,全國政協委員劉夢熊尋日出席港大一個活動時,就透露自己同特首梁振英CY已經重拾舊好,佢咁講,係想澄清特首選戰後兩人關係若即若離嘅揣測,佢仲話,CY上個禮拜請佢去禮賓府食飯,劉夢熊指CY團隊應該繼續力推新界東北同國教,意思係硬淨的!
對於有人話國教科係洗腦,劉直言感到反感同莫名其妙:「好似你去食飯咁,啲嘢食都未上枱,你憑乜嘢就話佢有毒,之後就反枱唔食o架?」至於割地賣港之說,佢就用「聳人聽聞」四個字回敬,又話啲人講嘢都幾荒謬喎。
不過,佢都批評CY對港獨問題漠不關心,皆因當時有示威者高舉米字旗兼大喊「中國人返中國」,但CY似乎對上水嘅水貨問題更加着緊,唔好「打烏蠅唔打大老虎」。
設計圖片及對白