人民力量立法會議員陳偉業（大舊），尋晚喺金鐘巧遇前港督衞奕信（Lord David Wilson），遇見舊朋友，大舊即刻上前拍照、傾偈，仲將相片放上社交網站。九二年卸任港督後就返咗英國嘅衞奕信點解重現香港?大舊冇問，不過，衞奕信有名係中國通，卸任後不時來港。
大舊話，尋晚佢啱啱喺金鐘食完飯，一行出嚟就見到個熟口熟面，兼且滿頭白髮嘅外籍人士，睇真啲，原來係前港督。照片可見，今年已經七十七歲嘅衞奕信精神好好，皺紋係多咗少少，但腰板仍然挺直，相信健康唔錯。