政壇：范太選人大論政收晒火

全國人大常委范徐麗泰早前多次公開批評新政府嘅處事手法，引起傳統愛國陣營議論紛紛。尋日佢喺北京開完全國人大常委會後見記者，忽然改晒口風收晒火，力撐長者生活津貼計劃，又強調前港澳辦副主任陳佐洱同基本法委員會副主任梁愛詩有言論自由，之後佢仲公開宣布會喺今年底角逐連任港區人大代表，唔知兩者係咪有關係嘅呢？

范太尋日指出，梁愛詩早前批評本港法官對中港關係缺乏認識，以及陳佐洱日前警告港獨勢力如病毒般蔓延等，范太個人更認為，梁愛詩嘅言論並無問題，又話陳佐洱對港英殖民地旗幟喺香港飄揚表痛心，但其實好多揸旗嘅年輕人，並非真正支持港獨，可能係純粹想表達對現況嘅不滿，各方毋須過分憂心。

范太又力撐長者生活津貼申報制度，強調社福界都支持咁做。問佢有冇信心連任港區人大以至人大常委，佢就話任何選舉都好難用「有冇信心」嚟形容，只能全力爭取喎。