政壇：陳茂波過三日財爺癮

樓市火熱到爆炸，財政司司長曾俊華尋日拖住三個局長現身，加碼再推兩招打擊樓市炒風措施，呢兩招加印花稅嘅招數好簡單，但市場嘅反應就好審慎，近排少咗現身公開場合嘅鬍鬚曾繼續「潛水政策」，呢頭宣布重招之後，嗰頭就飛去北京三日，帶挈曾被傳係財政司副司長嘅陳茂波可以試吓做財爺嘅滋味，雖然只係由本月二十九日做到三十一日，但都可以過三日官癮啦。

執三攤頂上

今次陳茂波可以客串財爺，實在要多得財經事務及庫務局局長陳家強，因為傻強會同鬍鬚曾一齊去北京、天津訪問，同負責香港事務、財金和貿易嘅中央部門及機構官員會面，包括國務院港澳事務辦公室、國家商務部、國家財政部、中國銀行業監督管理委員會、中國證券監督管理委員會、國務院國有資產監督管理委員會、中國保險監督管理委員會、國家發展和改革委員會及中國人民銀行等負責人會面。結果咪搵咗陳茂波執三攤做財爺囉。

出身會計嘅陳茂波七月之前一直係副財政司司長嘅大熱人選，可惜上屆立法會為咗新架構方案大打拉布戰，搞到唔選立法會嘅陳茂波兩頭唔到岸，卒之因為發展局前局長麥齊光被揭發房津申領有問題請辭，先畀咗陳茂波一個入仕機會，副司長做唔成咪轉做局長。依家有機會做三日財爺，唔知佢會唔會百般感受在心頭呢？不過，呢個風頭火勢之下做財爺，係咪執支好籌都好難講，事關政府重招打擊樓市後，經過周末嘅醞釀，禮拜一返嚟可能有唔少暗湧，陳茂波戴住署任財爺嘅帽，真係有鑊都要孭o架。