黑箱熄機變死機 警方害人終害己

乜嘢叫自作自受？乜嘢叫害人害己？呢，警方就係最新人辦嘞。

話說警方為咗箝制新聞自由，○四年起斥資近五億元引入所謂第三代數碼通訊系統，代替無線電通訊系統，變相「熄機」，截斷傳媒消息來源，扼殺公眾知情權。但搞笑嘅係，警方想封殺傳媒，點知結果連自己把口都封埋，號稱先進一流嘅數碼通訊系統前日居然無端端死火，又聾又啞十七個鐘頭先至回復正常，你話係咪害人終害己吖？

紙包唔住火，通訊系統死機十二小時之後，警方先至發稿通知傳媒，承認前日上午十一時零五分發生故障，導致港島總區指揮及控制中心部分電台未能與前線警務人員通訊。警方跌落地仲揦番拃沙，話死機十分鐘後電台轉用警察流動電話同前線警員保持通訊，九九九緊急服務未受影響喎。

嗱，九九九緊急服務有無受影響大家唔知，但係市民對警方嘅信心受影響就肯定嘞。你知啦，救急扶危爭分奪秒，通訊系統莫講話死機十七個小時咁離譜吖，就算延誤十分鐘，隨時都死得人o架。大吉利是講句，萬一期間撞啱發生大案，害到市民身家性命不保，呢隻鑊邊個孭得起吖？

警方話喎，故障原因仍在調查，其實計太一叮話齋，使乜查吖，原因一字咁淺：多行不義必自斃！唔係咩？前朝政府烏煙瘴氣，醜聞不絕，千方百計打壓新聞自由，就係為咗遮掩高官權貴嘅醜聞，所以咯喎，當局搞呢壇數碼通訊系統本身就係用心不良，家陣無故癱瘓自動收聲，可能係上天警告o架，正所謂天作孽，猶可恕，自作孽，不可活吖嘛，叮！

講開又講吖，警方轉換通訊系統，封鎖突發消息，害人終害己嘅結局絕對唔止死機咁簡單。你知啦，正義傳媒伸張正義，屢建奇功，依家消息來源被截，警方破案機會都小啲啦。好似「香港拉登」馬照聲單案，如果當年唔係東方報業集團第一時間報案，都唔知幾多市民無辜被害咯。

唉，熄機變死機，害人終害己。過氣特首曾蔭權貪腐醜行罄竹難書，佢心中有鬼，就話箝制新聞自由啫，家陣港府當家都換咗人，不如盡快撥亂反正，還公眾知情權，無謂又鬧出自動收嗲嘅大笑話，害人害物吖，叮！