SUN微博：打橫嚟講：停一停，諗一諗，咪中伏呀！

當全港市民齊齊堅決反對喺大埔龍尾灘建造「人工沙灘」之際，香港特區政府竟逆民意而行，昨日宣布該計劃拿拿臨「上馬」，非搞不可！

香港政府漠視民意的理由，係話佢哋內部認為經過諮詢，同埋立法會答應撥款程序，如果推倒重來，會為日後其他工程造成壞先例喎！

吓！梁振英政府為乜突然同貪曾前朝咁friend，佢响二○○七年連任成功後，答應回饋當地大哥的「送大禮」，今日，竟要現今政府去孭去受？唔係呀？

嗰度水質除咗不能游水之餘，那處本來的自然生態，如紅樹林、罕見瀕危稀有物種，統統皆遭慘戮損害，為何有啲人，以前挺身環保，今天竟潛伏宮中，幫腔做啲咁嘅嘢？係害政府吖？定害保育呢？

仲有不堪反智的笑料，就是當政府堆啲沙落原本自然生態優美的泥灘上，被十幾個環保組織狂轟「不該」時，當局居然話會起番個乜乜「生態教育中心」作「補償」喎！哈哈！先破壞環境，卻在旁邊話畀人知，何謂「生態保育」，低唔低B啲呀！

嗱！唔好畀我估中呀，呢單嘢如果梁振英政府硬闖上馬，一定會有不良後果，在今時今日，少一個炸彈，好過多一分功績呀！梁生，請快快「停一停，諗一諗」，睇吓邊個係人，邊個係鬼，咪上當呀！要上身o架！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：體育城改起屋？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot