政壇：政商定格：高永文難忘入藏想再去
日前喺尖沙咀文化中心舉行咗一個西藏攝影展，到場湊熱鬧嘅新鴻基地產非執董郭炳湘話好欣賞西藏風光，但對上一次入藏已係八至十年前嘅事喇。順便問佢媽咪郭老太身體近況如何，佢連聲答話：「好好！好好！」
食衞局局長高永文多年前同班眼科醫生去幫西藏白內障患者做手術，最難忘係當時行川藏公路入藏，沿途翻越多座險峻高山，好壯觀，至今依然回味無窮。
對於李嘉誠基金會董事洪小蓮擔心去西藏有高山反應，高永文一聽到就拍心口話，下次同佢一齊去就唔怕喇，事關佢會帶齊所有西藥去，「不過，要等我落咗台先！」
郭炳湘（左）及婦協主席林貝聿嘉（右）都對西藏風光讚不絕口。
高永文（左）叫洪小蓮（右）一齊遊西藏。