政壇：搞搞政：李少光挾「三高」參選人大

港區全國人大代表選舉初定喺十二月下旬舉行，據聞現屆三十六名人大中，約十人會退下火線，有政治耳語話連同角逐連任嘅二十多名人大，可能多達六十至七十人報名參選，最新消息更傳出保安局前局長李少光亦躍躍欲試。

消息指李少光為官期間一向畀人「三高」印象，即高民望、高人氣同高能力，加上佢同唔同政見嘅人都有傾有講。最近有政界中人爆料，話佢近期好活躍，頻頻出席酒會活動同各界人士打交道，同一眾退休後近乎絕迹政圈嘅前高官成強烈對比。

有政界中人則指李少光離任前接受傳媒訪問時，曾有所暗示日後會有新發展，當時佢話離任後好樂意「以唔係做官嘅身份」繼續服務香港、服務國家，估唔到事隔只有四個多月，就被游說參選人大。

仲記得○八年時，前廉政專員羅范椒芬參選人大，最後順利得到各方支持並當選，唔知同樣做過廉政專員嘅李少光，會唔會向羅太取經呢？