政壇：林鄭趁墟狂掃有機蔬果
政務司司長林鄭月娥同發展局局長陳茂波，尋日孖咇出席觀塘駿業街遊樂場嘅藝術加綠色生活活動啟動儀式，兩位高官平時唔知係咪工作太忙冇機會買嘢，一見到現場嘅有機農墟即刻開心到雙眼發光，滿場飛不斷買，結果兩人分別用咗三百二十二元同三百五十七元買有機產品，滿載而歸。
林鄭買嘅有機產品中，最貴係冬瓜，要成百元一個。但最特別嘅係，曾做過發展局局長嘅林鄭，一見到大棠荔枝園個招牌，即時衝埋去買有機芽菜。大家應該記得，大棠荔枝園其中一個老闆係十八鄉鄉事委員會主席梁福元，林鄭之前同佢因僭建問題爭拗，但尋日仍然畀面幫襯，相當識做。
