擱置體育城無賴 病急亂投醫無聊

古人教落，唔好病急亂投醫，否則隨時弄巧反拙，愈醫愈大鑊。呢，樓價持續飆升，政府方寸大亂，居然放出風聲，考慮擱置啟德體育城計劃，將塊地改為興建房屋，以解決無地可用嘅困境喎。消息係真係假仲未得到證實，但體育界已經群情洶湧，怒斥政府言而無信，不排除發起體育界抗爭咁話。

又難怪體育界咁激動嘅，事關啟德體育城好事多磨，幾經拖延先至拍板，點知依家又傳計劃有變，唔嬲就假啦。正如港協暨奧委會副會長許晉奎話齋，雖然政府仲未正式表態，但空穴來風未必無因，體育界對擱置傳聞非常反感，呼籲政府唔好低估佢哋嘅力量，如果搞到運動員都要上街，對整個社會都冇好處o架。

講真吖，擱置啟德體育城呢條橋又真係搵嘢嚟搞，簡直係製造爭議，添煩添亂。體育城計劃已經規劃咗十幾年，研究復研究，諮詢又諮詢，如果推倒重來，就算搵到其他地點代替，隨時又要等多十幾年，你話喇，人生究竟有幾多個十幾年吖？唔怪得體育界人士指政府過橋抽板、出爾反爾喇！

叮，呢啲咪叫病急亂投醫囉。冇錯，房屋問題迫在眉睫，亟待解決，政府自己無計，增地無方，一味打體育城主意，都好無賴啫。就算有人替政府補鑊，聲稱唔使擱置整個計劃，只需將佔地二十公頃嘅體育城減半，騰出部分土地建屋就可以咯喎。其實，咁都解決唔到幾多問題o架。再講，遠水難救近火，喺目前嘅社會及政治氣氛下，乜嘢都拗餐飽，擱置又好，減半又好，根本冇可能喺短期內達成共識，拗得嚟蛇都死喇。

老老實實，香港其實唔係無地，而係政府動輒得咎，有地都用唔到啫。嗱，新界東北大片土地閒置，本來可以興建唔少房屋，為十幾萬人提供安居之所，點知畀人扣咗個「割地賣港」嘅帽子，搞到寸步難行。政府話就話有二千一百幾公頃土地儲備，可惜淨係丁屋用地就佔咗九百幾公頃，七除八扣，真正用嚟興建一般住宅嘅土地只有三百幾公頃。講起都好笑，新界原居民只佔全港人口一成，但丁屋用地就佔咗政府土地儲備七成，問你服未。

所以話，弱勢政府百事哀。當局唔敢檢討及改變丁屋政策，亦擺唔平政治爭拗加快發展新界東北，淨係識得打啟德體育城主意，根本就係欺善怕惡，唔怪得體育界人士拍案而起啦，叮！