政壇：搞搞政：黃錦星慳電勁黑英認輸

一向好環保嘅天文台前台長「黑英」林超英，尋日出席電台節目時爆料，話環境局局長KS黃錦星積極喺屋企搞節能，可以每人每日只用約一度電，比佢每人每日用兩度電仲要低，「連我都打低埋，梗係有理由做局長！」

黑英話KS係建築物節能專家，對呢方面好有心，有心到喺屋企搞節能，做到每人每日只係用約一度電，證明佢好有熱誠。佢仲話如果KS只係諗住求求其其咁做局長，其實好容易過，但依家KS咁勤力，就會令自己好難過喇；佢仲講笑話，見KS咁瘦，就知對方有幾勤力啦！

有人話KS對於撤回大埔龍尾灘方案轉咗口風，黑英就天文台台長上身，話口風嘅嘢係「風」嚟，無定向風日日都可以改，所以不作評論。對於龍尾灘單嘢有冇轉機，佢就話天氣好難預測，政治氣候更加難測，要睇政府嚟緊點行先至知，佢話：「好似你問我掛唔掛八號波一樣」，都係言之尚早喎。